قصيدة ام وضعها ولدها الوحيد في دار العجزه من اجل ارضاء زوجته

هذي قصيدة ام بعد ان وضعها ولدها الوحيد فى دار العجزه ليرضى زوجته
(حسبيى الله ونعم الوكيل )
اترككم مع القصيده

وين انت يا حمدان امـك تناديـك

وراك مـا تسمـع شكايـا وندايـا

يا مسندي قلبي على الدوم يطريـك

ما غبت عن عيني وطيفك سمايـا

هذي ثلاث سنين والعيـن تبكيـك
ما شفت زولك زايـر يـا ضنايـا

تذكر حياتي يـوم اشيلـك واداريك
والاعبـك دايـم وتمشـي ورايـا

ترقد على صوتي وحضني يدفيـك
ما غيرك احدٍ ساكن فـي حشايـا

واليا مرضت اسهر بقربك واداريك
ما ذوق طعم النوم صبـح ومسايـا

ياما عطيتك من حنانـي وبعطيـك
تكبـر وتكبـر بالأمـل يـا منايـا

لكن خساره بعتني اليـوم وشفيـك
واخلصت للزوجه وانا لي شقايـا

انا ادري انها قاسيـه مـا تخليـك
قالت عجـوزك مـا ابيهـا معايـا

خليتني وسط المصحه وانا ارجيك
هذا جزا المعروف وهـذا جزايـا

يـا ليتنـي خدامـة بيـن اياديـك
من شان اشوفك كل يوم برضايـا

مشكور يا ولدي وتشكر مساعيـك
وادعـي لـك الله دايـم بالهدايـا

حمدان يا حمـدان امـك توصيـك
اخاف من تلحق تشـوف الوصايـا
اوصيت دكتور المصحه بيعطيـك
رسالتـي واحروفهـا مـن بكايـا

وان مت لا تبخل علـي بدعاويـك
واطلب لي الغفران وهـذا رجايـا

وامطر تراب القبر بدموع عينيـك
ما عـاد ينفعـك النـدم والنعايـا



ولمن اراد يسمع القصيده بالصوت

https://www.youtube.com/watch?v=WDMFd_ge-28

لا حول ولا قوة إلا بالله العلي العظيم

اللهم لا تكتبها على مسلم

لا حول ولا قوة الابالله
والله لا يكتبهااا علي مسلم
يااارب
واشكرك علي طرحك وعلي المجهود الرااائع
الذي تقوم فيه

لاحول ولا قوة الابالله العلى العظيم
يعطيك العافية اخى سلطان على الطرح

لاحول ولا قوه الا بالله